Nakomyewo muganda wammwe Mukama yantuma okubawanga ebindi ku mwoyo
Nange ne sifuuka kaasa kujeemera Mukama ntuukiriza endagaano yange
Bwe wabaawo eyali ampulidde nga nnyimba mu bibuga ne mu byalo ndi muyigisa nnyo
Lwaleero nkawaŋŋamudde Mukyala Kandida vva ku Jimmy omusukkiridde
Abakazi abakaddekadde okusinga ku nnyabo ate naddala abalina ku bintu
Ye naddala abagumbawadde muzinze n’enkato okwetikka obulenzirenzi
Muleseewo size zammwe nga Muzeeyi Matayo ataakulumyenga muyite mwenna
Weekebera amatama wegaabanga kati nsalosalo n’envi zimeruukiridde
Face ekufufunyadde olw’ensonga y’okkula n’emabega ekuserebenze
Kuva buto otabadde mu nsi ki kyotonnalaba ssi mululu naye ago maddu
Ke kadde wummula ensi olyetunga ku ttutu koma awo n’abato bakwazze
Naye laba bw’ozze kalenzirenzi!
Okagulira empale n’omwenge kati laba ogula bbiya kw’otadde omukoolakoola
Kaakati kasiriwadde ate ggwe oli mukulu ogenda kufa okaleke ku kyalo
Nga n’okuzaala keerabidde kuba ebiseera by’okuzaala gwe wakatawaanya n’okafiiriza
Mpuliddewo abakaddekadde awo abeemulugunya nga baagala nkome awo mangu
Mpuliddewo abakaddekadde awo abeemulugunya nga baagala nkome awo mangu
Nti bo baba batudde obulenzi bwennyini ne bubasooka okubakwana
Nnyabo toyomba mangu anti n’entunula yo era ekulaga obutayitwako
Olulengera omulenzi yenna ng’okyusa ku nkula ng’otunuza obusendasenda
Amatama ogasenzesenze osika embugubugu zinywerere bulungi ku mba
N’amaaso agazigaladde n’ogabbako mpola nga bw’oggyamu obujonjojonjo
Ab’engeri eno mwafuna dda erinnya eribaawula tubanyumyako ne ku mwenge
Linnya ddungi mwana wange ba mukadde anyirira nakyo kika kiri awo kyokka
Kino ekika kyo tolibuuza nti ogenda wa nnyabo baba banoonya baana bammwe
Nagambye yeezira kusanga n’akyamula figure n’olaba bw’anyigiriza enkoggo
Omugongo gwakula dda gusaanamu mpagi n’olaba bw’agucangacanga
Mmwe mukwana obulenzi bwammwe, lwa butoogera mukozesa magezi gokka
Ate olumala okakwana ng’okkirira ttale okanogereyo omukoolakoola
Ng’otereka kigwagwa kyo eka kisiiba mu bulangiti
Kivaayo kwasa ku nku na kwera mu mbuzi
Tekigenda mugga kusanga banyirira
Kale omusibidde eka ate ggwe oli mukulu tokyalina magi na munda
Kati okuzaala yeerabidde ggwe omwongera mmale saasirako ku baamuzaala
Era otyoboola obukadde bwammwe
Mwali ba kitiibwa wabula ako
Ssibavumye mbabuuliridde
Mwalaba ki ku size ento abazeeyi mmwe mbuuza nsaba tuddeko mu kaama?
Ne mulekawo abasajja be muyinza okulaga mu bantu ne mukumba nga muggumidde
Ggwe ow’emyaka ataano bw’oganza Matayo ow’enkaaga kirungi na nnyo
Naye Jimmy ow’abiri gokka njagala obe n’ensonyi weebikka otya n’oyo mu nju?
Ka kitange okawemudde, lwabutoogera kaguma lwakuba mpale mpya
Saagadde mpemule bantu, nandyatudde ne mukkuta obugwagwa bwammwe
Ekyo nkibalekedde mwekebejje abazeeyi abaami mmwe muba musembera ku mwanjo
Omusajja okuliridde n’awaka oyitwa ssebo agaana ogawunduludde
Wadde tozadde kyokka wazaalwa ku Kabaka Chwa okuze era ogundidde
Laba bw’ojja oludduddu ng’osanze ka nnyabo obubeere bususuukiridde
N’okagamba obutafaayo kabikwate na mpola kakuganze mpola mu kyama
Mbu era wakaagala dda bukyanga okalaba n’emmeeme yo kaagitwala
Kambuuze taata wange bukuvudde wa obwagazi bw’ako k’olaba eggi?
Weepimeemu wooli wenna wadde oli mu ngoye ate otunule ku bbujje liri
Ne Katonda akutunuulidde ali awo ku bbali ggwe tomulaba naye ye waali
Keemodde kakazi kattu anti kakwatwa n’ensonyi
Naawe oswakidde ofuuse ne colour
N’oluusi omulevu gwa nvi bwe kagutulako ne kawulira ekikyamu munda
Keewozezza ssebo by’oŋŋamba nga ssibisobola ko ggwe nze mmanyi tugende
Kati laba okakulembedde bw’ogenda ogaziwa ozimbye olw’okuba ofunye eggi
Ekkooti ekukunukidde anti k’onyumya nako kampi akakukoosakoosa
Abasajja abakulu mmwe mubeere n’ensonyi nga muwemudde baana bammwe
Apaana muddeyo ku gakadde gammwe
N’abato muleke bazannye n’abato envuumuulo
Obusoma mubwebagazze ye naabagamba ki olaba muganza obukola eka!
Nze simanyi gye mwaggya maddu kuganza kakozi ke waleeta ewaka kafumbe!
Laba bw’otuutidde anti otudde mu ntebe kko kali wali kafukamidde
Ne by’okagambye kawulidde naye katya mukyala wo ggwe okagumizza obutafaayo
Ate ennaku yakalaba dda nga mukoozesa engoye n’okuyonja ebiri mu nju
Kati okagamba keetereeze okawadde n’ensimbi kagule ebyakabulanga
Tekakyayinza mwana wange kugondera mukazi kuba kamanyi we kalya w’alya
N’omukazi omukenenudde buli lwe kamulaba kaba kamanyi ku byamutuuza
Akagambye kw’oza bintu nga kafuuka ka ggume
Gy’anaakaloopa yonna kamanyi tokyanyeze
Kubanga kaakukwasa ng’amaddu gakuluma kaakati kawaganyadde
Ebintu ebyo bingi mu nsi nga byonoonye maka kitalo abaami obutateeka
Eby’embi nga binajja otuuyana ku ggolu
Eby’embi nga binajja otuuyana ku ggolu
Ensi etubijjiridde obwana obuwala obuto nabwo bufuuse leenya
Ebintu by’obufumbo edda ng’omala kula nga teri kye wali otegedde
Naye kati akawala konna kasita koogera kamanyirawo omusajja ky’eki!
Yaddeyaddeko mu byalo naye obwomubibuga tekyali gw’oyita na muntu
Anti enju zoomubibuga zonna eddiiro ky’ekisenge enjawulo lutimbe lwokka
We muzaalidde abaana bammwe ggwe ne mukyala wo akulamu mwalira awo wansi
Lwaki taakuguke mu nsi nga mwamuzzaako alaba nkomye awo mpitiridde
Ekibuga twajjirwa nagwo musango muloope ekitaliimu kalungi konna
Ani anampakanya ku lunnabe lw’ekibuga ekyonoonye wano buli kantu
Empisa z’obuwangwa zonna zifiira mu bibuga
Kubanga gw’oliraanye munno tazaagala
Ggwe bw’owamattuka mu nju yo ogenda bugenzi kubanga toomunyege kantu
Anti olulimi lwo talutegeera
Obwana bw’olina awaka kale ne bujja buva buto nga bumanyidde obutabuuza
Osanga kalalambadde kanaakunyega katya wadde eka kyekatalabanga
Bwe buzibu obuzuuse mu nsi lwa kwagala bibuga tebiriimu kalungi konna
Ekintabuli kiyitiridde
N’omuvuyo ogw’ensula yaffe
Mu nnyumba eringa aka latrine, bisaana bagumba
Mbadde mbabuuliridde munaalemwa kuyiga nze ngogola Uganda yattu
Mbadde mbabuuliridde munaalemwa kuyiga nze ngogola Uganda yattu
Ekisooka mukazi wattu Mukyala Kandida vva ku Jimmy akusukkiridde
Naawe omwami okuliridde okuganza abawere ssi mululu naye ago maddu
Njagala mwawulenga omuzigo ku ddibu
Mwawule ekitakambagga ku ppeera n’entula
Saagala mwelogozze njogedde mu lwatu buli alina akaze ke konna
Amannya mpitibwa Basudde
Ery’ekizungu Herman eri ndi mugave
Ŋŋenze abalungi mwenna, mubeere balamu
Share Mukyala Kandida Lyrics by Herman Basudde
📣 Do you find Musiclyfer useful? Follow us on Facebook(@musiclyfer) and stay updated.
